لو بتشتغل علي إكسيل بقالك فترة أكيد قابلتك مشكلة التكرار أسماء عملاء مكررة منتجات داخلة أكتر من مرة ايميلات مكررة أو حتي أرقام موظفين مكررة زمان كنا بنعالج الموضوع ده بفلترة أو Remove Duplicates بس دلوقتي مع إكسيل 365 الموضوع بقي أسهل وأذكي بكتير بفضل دالة UNIQUE
دالة UNIQUE من الدوال الحديثة والقوية جدا ومهمتها ببساطة إنها تطلعلك القيم غير المكررة من أي نطاق بيانات تلقائي ومن غير تعب
- دالة UNIQUE:
دالة UNIQUE بتاخد عمود أو صف أو نطاق بيانات وهتطلعلك نسخة جديدة من غير أي تكرار يعني لو عندك 100 صف فيهم أسماء مكررة الدالة هتطلعلك كل اسم مرة واحدة بس
الميزة الحلوة هنا إن النتيجة بتكون ديناميكية يعني لو البيانات الأصلية اتغيرت النتيجة تتحدث لوحدها
- شكل دالة UNIQUE:
UNIQUE(array, [by_col], [exactly_once])=
متقلقش شكلها كبير بس بسيطة جدا
- شرح كل جزء في الدالة:
- array:
وده أهم جزء وهو نطاق البيانات اللي انت عايز تشيل التكرار منه
ممكن يكون:
- عمود واحد
- أكتر من عمود
- صف واحد
- جدول كامل
مثال:
UNIQUE(A2:A20)=
- by - col اختياري:
الجزء ده بيحدد هل إكسيل يشوف البيانات بالأعمدة ولا بالصفوف
- لو سيبته فاضي → إكسيل بيشتغل على الصفوف وهو الطبيعي
- لو كتبت TRUE → إكسيل هيشتغل على الأعمدة
غالبا مش بنحتاجه إلا في حالات خاصة
- exactly - once اختياري:
ده بقي جزء مهم جدا
بيحدد:
- هل هتطلع القيم اللي اتكررت مرة واحدة بس؟
- ولا كل القيم من غير تكرار؟
القيم:
- FALSE أو فاضي → يطلع كل القيم بدون تكرار
- TRUE → يطلع القيم اللي ظهرت مرة واحدة فقط
لشرح دالة FILTER في إكسيل اضغط هنا
- خطوات استخدام دالة UNIQUE:
- في الأول حدد نطاق البيانات اللي عندك واللي فيه تكرار سواء كان عمود أسماء - أرقام أو بيانات مبيعات ومصروفات وتأكد إن البيانات مكتوبة بشكل منتظم من غير فراغات أو صفوف فاضية ملخبطة
- اختار خلية فاضية تماما علشان تحط فيها نتيجة الدالة ويفضل تكون بعيد عن الجدول الأصلي علشان النتائج ما تتداخلش مع البيانات القديمة
- اكتب علامة يساوي = وبعدها استدعي دالة UNIQUE من الكيبورد أو اختارها من اقتراحات إكسيل اللي بتظهر أثناء الكتابة
- حدد بالماوس نطاق الخلايا اللي عايز تستخرج منه القيم غير المكررة وبعدين اقفل القوس واضغط Enter
- بعد الضغط على Enter إكسيل هيعرض القيم غير المكررة تلقائي في أكتر من خلية تحت بعض وده طبيعي جدا لإن دالة UNIQUE من الدوال الديناميكية
- لو محتاج تظهر القيم اللي اتكررت مرة واحدة بس عدل الدالة وضيف الخيار الخاص بده، وده بيساعدك في اكتشاف الأخطاء أو البيانات الشاذة
- في الآخر راجع النتيجة كويس ولو لاحظت اختلافات بسبب مسافات زيادة أو كتابة مختلفة استخدم دوال مساعدة قبل UNIQUE علشان تطلع نتيجة أدق
- مثال عملي بسيط علي دالة UNIQUE:
لو عندك عمود فيه أسماء عملاء:
الاسم:
- أحمد
- محمد
- أحمد
- علي
- محمد
وكتبت:
UNIQUE(A2:A6)=
النتيجة هتكون:
- أحمد
- محمد
- علي
كل اسم مرة واحدة بس
- مثال علي exactly - once:
لو استخدمت:
UNIQUE(A2:A6,,TRUE)=
النتيجة هتكون:
- علي
لأن أحمد ومحمد اتكرروا وعلي بس هو اللي ظهر مرة واحدة
لشرح دالة CHOOSE في إكسيل اضغط هنا
- دالة UNIQUE مع أكتر من عمود:
لو عندك جدول مبيعات فيه:
- اسم العميل
- المنتج
وعايز تطلع التركيبات الفريدة بينهم:
UNIQUE(A2:B20)=
هتلاحظ إن إكسيل بيشوف الصف كامل مش عمود لوحده وده مفيد جدا في التقارير
الفرق بين UNIQUE و Remove Duplicates:
Remove Duplicates UNIQUE
ديناميكية ثابتة
معادلة أداة
تتحدث تلقائي لا
تنفع في تقارير تنفع تنظيف بيانات
يعني لو شغلك تقارير وداشبورد → UNIQUE أفضل بكتير
- استخدامات عملية لدالة UNIQUE:
- استخراج قائمة عملاء بدون تكرار
- تجهيز Dropdown نظيفة
- تحليل بيانات Pivot Table
- تحليل بيانات المبيعات
- دمج دالة UNIQUE مع دالة SORT:
مثال:
SORT(UNIQUE(A2:A100))=
كده انت:
- شيلت التكرار
- رتبت البيانات
كل ده في معادلة واحدة
- أشهر الأخطاء مع دالة UNIQUE:
- ❌ خطأ #SPILL!:
بيظهر لما:
- في خلايا فاضية مش فاضية تحت المعادلة
الحل:
✔ فضي المكان أو حط المعادلة في مكان فاضي
- النتايج مش مظبوطة:
غالبا بسبب:
- مسافات زيادة
- اختلاف حرف كبير وصغير
الحل:
✔ استخدم دالة TRIM أو دالة CLEAN قبل دالة UNIQUE
- القيم غير الصحيحة بسبب رموز مخفية:
ممكن بعض البيانات فيها رموز غير ظاهرة زي مسافات غير مرئية أو حروف خاصة
الحل:
✔ استخدم CLEAN قبل UNIQUE لتنضيف البيانات
- دالة UNIQUE مش موجودة:
ده بيحصل لو بتشتغل على إصدارات قديمة من الإكسيل زي 2016 أو 2010
الحل:
✔ استخدم إكسيل 365 أو 2021
- تحديد نطاق خاطئ:
لو حددت نطاق ناقص أو فيه خلايا غلط، النتيجة هتكون غير دقيقة
الحل:
✔ راجع نطاق البيانات قبل ما تستخدم UNIQUE
- دمج UNIQUE مع دوال أخرى بشكل غير صحيح:
زي SUMIFS أو COUNTIFS لو النطاقات مش متطابقة هتظهر أخطاء
الحل:
✔ تأكد إن كل النطاقات متساوية وعدد الصفوف مطابق قبل الدمج
لشرح دالة SORT في الإكسيل اضغط هنا
- نصايح مهمة وانت شغال بدالة UNIQUE:
- استخدمها دايما مع الجداول الديناميكية
- حطها في شيت منفصل للتقارير
- جرب exactly _ once في التحليل
- مع البيانات الكبيرة هتوفر وقت رهيب
- دالة UNIQUE واحدة من أقوي دوال إكسيل الحديثة ووجودها اختصروقت ومجهود كبير جدا في شغل التحليل والتنظيف لو لسه بتستخدم Remove Duplicates يدوي يبقي لازم تبدأ تعتمد علي دالة UNIQUE من النهاردة
- يرجى مشاركة المقال مع أشخاص آخرين لتعم الفائدة ونشرها على حساباتك الشخصية على مواقع التواصل الإجتماعي من الأيقونات أسفل المقال