لو بتشتغل على الإكسيل يوميا سواء في الحسابات - الموارد البشرية - المخازن - أو حتى شغل التحليل فأكيد بتتعامل مع نصوص كتير:
أكواد موظفين – أرقام فواتير – أرقام موبايلات – إيميلات – عناوين – أكواد منتجات
وساعات كتير جدا بتحتاج تطلع جزء معين بس من النص ده
هنا بقى تيجي واحدة من أهم وأقوى دوال النصوص في Excel وهي دالة MID
الدالة دي بسيطة في شكلها لكن قوية جدا في تطبيقاتها
- دالة MID:
كلمة MID جاية من كلمة middle يعني المنتصف
وظيفتها إنها تستخرج عدد معين من الحروف من نص ابتداء من مكان معين
يعني انت بتقول للإكسيل:
ابدأ من الحرف رقم كذا وهاتلي عدد كذا من الحروف
- شكل الدالة الأساسي:
الصيغة بتاعتها كده:
MID(text, start_num, num_chars)=
خلينا نفهم التلات أجزاء دول واحدة واحدة
- text:
ده النص اللي انت عايز تستخرج منه جزء ممكن يكون خلية فيها نص أو كتب النص بين علامتين تنصيص
- start - num:
ده رقم الحرف اللي هتبدأ منه الاستخرج
* أول حرف في النص رقمه 1 مش صفر
- num - chars:
ده عدد الحروف اللي انت عايز تطلعهم من بعد ما تبدأ
- مثال بسيط جدا:
لو عندك في الخلية A1 الكلمة دي:
REYADA2026
وعايز تطلع كلمة REYADA بس من غير الأرقام
تكتب:
MID(A1,1,6)=
- ليه 1؟
علشان تبدأ من أول حرف
- ليه 6؟
علشان كلمة REYADA مكونة من 6 حروف
- النتيجة هتطلع:
REYADA
- مثال تاني: استخراج أرقام من وسط نص
لو عندك كود زي:
INV-4589-2026
وعايز تطلع الرقم 4589 بس
نعد الحروف:
I = 1
N = 2
V = 3
* = 4
4 = 5
يبقي الرقم يبدأ من الحرف رقم 5
وطوله 4 أرقام
- المعادلة:
MID(A1,5,4)=
هتطلع النتيجة:
4589
- أهم نقطة لازم تفهمها:
دالة MID مش بتفهم الكلمات هي بتعد حروف بس:
- يعني المسافة تعتبر حرف
- الشرطة تعتبر حرف
- أي رمز يعتبر حرف
فلازم تعد صح
لشرح دالة LOWER في إكسيل اضغط هنا
- استخدام دالة MID مع الدوال التانية:
دالة MID تبقي قوية جدا لما تربطها مع دوال زي:
- LEFT
- RIGHT
- LEN
- FIND
- SEARCH
- مثال احترافي: استخراج اسم من إيميل
لو عندك الإيميل ده:
mohamed@gmail.com
وعايز تطلع اسم mohamed بس
نقدر نستخدم دالة FIND علشان نحدد مكان علامة @
وبعدها دالة MID تستخرج الجزء اللي قبلها
- المعادلة هتبقي:
MID(A1,1,FIND("@",A1)-1)=
- ايه اللي حصل هنا؟
- دالة FIND جابت مكان علامة @
- طرحنا 1 علشان منجيبهاش
- دالة MID استخرجت النص من أول حرف لحد قبل @
- مثال تاني: استخراج السنة من اريخ مكتوب كنص
لو عندك:
Invoice-15-03-2026
وعايز تطلع السنة بس
لو عارف مكانها:
MID(A1,15,4)=
- لكن لو مش ثابتة؟
هنا نستخدم دالة SEARCH مع دالة MID
- الفرق بين دالة MID ودالة LEFT ودالة RIGHT:
ناس كتير بتتلخبط بينهم:
- دالة LEFT:
بتاخد حروف من الشمال بس
- دالة RIGHT:
بتاخد حروف من اليمين بس
- دالة MID:
بتاخد من النص من أي مكان في النص
يعني دالة MID هي المرنة فيهم
لشرح دالة UPPER في إكسيل اضغط هنا
- أخطاء شائعة لازم تاخد بالك منها:
- تبدأ العد من صفر:
غلط العد بيبدأ من 1
- تطلب عدد حروف أكبر من النص:
هيديلك المتاح بس مش هيوقع الإكسيل
- تنسي إن المسافات بتتحسب:
لازم تعدها من ضمن الحروف
- استخدام دالة MID في الحسابات:
لو بتعمل برنامج حسابات في الإكسيل ومثلا عندك رقم فاتورة بالشكل ده:
INV-CUS-2026-001
- تقدر تستخدم دالة MID:
- تطلع كود العميل
- تطلع السنة
- تطلع الرقم المسلسل
وده مفيد جدا في التقارير والتحليلات
- مثال عملي تطبيقي خطوة بخطوة:
لو عندك جدول فيه أكواد موظفين بالشكل ده:
EMP-IT-1025
EMP-HR-2040
EMP-AC-3010
وعايز تطلع القسم بس IT أو HR أو AC
القسم بيبدأ من الحرف رقم 5
وطوله حرفين
- المعادلة هتبقي:
MID(A2,5,2)=
اسحب المعادلة لباقي الصفوف هتطلع الأقسام كلها
- استخدام متقدم: استخراج نص بين شرطتين
لو عندك نص بين شرطتين وعايز تجيب اللي بينهم
زي:
PRD-OfficeChair-5500
وعايز تطلع اسم المنتج بس
هنا هنستخدم دالة FIND مرتين + دالة MID
- المعادلة هتبقي:
MID(A1,FIND("-",A1)+1,FIND("-",A1,FIND("-",A1)+1)-FIND("-",A1)-1)=
- استخدام دالة MID مع دالة LEN:
دالة LEN بترجع عدد حروف النص
ممكن تستخدمها لو عايز تستخرج آخر جزء من النص بس مش عارف طوله
- مثال:
MID(A1,5,LEN(A1)-4)=
يعني ابدأ من الحرف الخامس وكمل لآخر النص
استخدام MID في تنظيف البيانات Data Cleaning:
من أقوى استخدامات دالة MID إنها بتساعدك جدا في تنظيف البيانات وده مهم جدا خصوصا لو بتستورد بيانات من نظام تاني أو من ملف CSV أو من برنامج حسابات
كتير بنستقبل بيانات بالشكل ده:
ID: 4589
Phone: 010-5566-7788
Ref#2026/HR/105
الأرقام والنصوص بيبقوا ملزوقين مع رموز أو كلمات زيادة وده بيصعب عملية التحليل أو الفرز أو إنشاء تقارير
هنا نستخدم MID علشان:
- نفصل رقم الموبايل من غير الشرطات
- نستخرج رقم المرجع من وسط الكود
- نفصل الجزء المهم بس ونسيب الباقي
- مثال عملي:
لو عندك رقم موبايل بالشكل ده:
010-5566-7788
وعايز تطلع الجزء الأوسط بس 5566
نعد الحروف:
0 = 1
1 = 2
0 = 3
- = 4
5 = 5
يبقى الرقم يبدأ من الحرف 5 وطوله 4
المعادلة:
MID(A1,5,4)=
وده بيسهل عليك بعد كده تعمل عمليات حسابية أو مقارنة أو فلترة
* نصيحة احترافية:
لو لقيت نفسك بتستخدم MID كتير مع أرقام ثابتة اسأل نفسك:
هل مكان الجزء ده ثابت فعلا في كل الصفوف؟
لو ثابت → تمام استخدم أرقام مباشرة
لو مش ثابت → لازم تعتمد على FIND أو SEARCH علشان تبقى المعادلة ديناميكية ومتمشيش غير لما البيانات تتغير
وده الفرق بين استخدام عادي واستخدام احترافي
- امتي استخدم دالة MID؟
استخدمها لما:
- يكون النص طويل
- عايز جزء من النص من النص
- عندك أكواد ثابتة الشكل
- بتتعامل مع أرقام داخل نصوص
دالة MID هي أداة قوية جدا لاستخراج جزء محد من نص
بناء علي:
- مكان البداية
- عدد الحروف
ولو ربطتها مع دالة FIND أو دالة LEN
هتوصل لمستوي احترافي في التعامل مع النصوص داخل إكسيل
- يرجى مشاركة المقال مع أشخاص آخرين لتعم الفائدة ونشرها على حساباتك الشخصية على مواقع التواصل الإجتماعي من الأيقونات أسفل المقال