برنامج الإكسيل بقى جزء أساسي من حياتنا اليومية سواء في الشغل أو الدراسة وبقى من البرامج اللي مستحيل نستغنى عنها إحنا بنستخدمه في حاجات كتير زي حسابات مالية وتنظيم بيانات ورسم جداول وتنسيق تقارير ومن أهم الحاجات اللي لازم كل حد يتعلمها هي الاختصارات و الأوامر السريعة
الاختصارات دي عبارة عن مجموعة من المفاتيح اللي بتضغطها مع بعض علشان تختصر الوقت وتعمل حاجات بسرعة من غير ما تستخدم الماوس أو تروح في القوائم
- الاختصارات والأوامر السريعة في إكسيل:
الاختصارات دي عبارة عن أوامر بتقدر تعملها باستخدام المفاتيح على الكيبورد بدل ما تروح للماوس علشان تفتح القوائم وتبحث عن الأوامر بدل ما تروح تضغط على الأيقونة بتاعة النسخ في الشريط العلوي ممكن تعمل نسخ بسرعة عن طريق الضغط على Ctrl + C الفكرة هنا إنك بتخلي إيدك تشتغل بشكل أسرع وتستخدم المفاتيح اللي على الكيبورد بدل ما تضيع وقتك في تحريك الماوس
في إكسيل في اختصارات لكل حاجة تقريبا من التنقل بين الخلايا لنسخ البيانات لتنفيذ العمليات الحسابية وحتى التنسيق والتعديل
- أهم اختصارات التنقل جوه الشيت:
لما تكون شغال على شيت كبير ومعقد في اختصارات بتخليك تتحرك بسرعة ما بين الخلايا بدل ما تضيع وقتك في التمرير بالماوس أو الأسهم
- Ctrl + الأسهم: لو عايز تروح بسرعة لآخر البيانات في أي اتجاه يمين، شمال، فوق، تحت
- Ctrl + Home: لو عايز ترجع أول خلية في الشيت
- Ctrl + End: لو عايز تروح على آخر خلية في الشيت مستخدمة
- Page Up / Page Down: لو عايز تتحرك بين صفحات البيانات بدل ما تحرك الماوس أو الأسهم
ده بيساعدك لو الشيت فيه كمية بيانات ضخمة
لشرح شرح دالة XLOOKUP في الإكسيل اضغط هنا
- اختصارات التحديد Selection:
في إكسيل التحديد جزء أساسي من شغلك علشان لما تبقي عايز تشتغل على مجموعة خلايا او تلغي تنسيق أو حتى تعمل عملية حسابية على أكتر من خلية في وقت واحد لازم تعرف تختار الخلايا بسرعة
- Shift + الأسهم: لو عايز تحدد مجموعة خلايا مع بعض
- Ctrl + Shift + سهم: لو عايز تحدد كل البيانات من أول الخلية لحد آخر خلية في الاتجاه ده
- Ctrl + A: لو عاي تحدد كل البيانات في الشيت
- Ctrl + Space: لو عايز تحدد العمود بالكامل
- Shift + Space: لو عايز تحدد الصف بالكامل
دي اختصارات بتسهل عليك الشغل لو كنت بتشتغل على شيت فيه بيانات كتير
- اختصارات النسخ واللصق والتعديل:
النسخ واللصق هما من أكثر العمليات اللي بنعملها في إكسيل بشكل مستمر فاستخدام الاختصارات فيها هيوفر عليك وقت كبير
- Ctrl + C: لنسخ البيانات
- Ctrl + X: لقص البيانات
- Ctrl + V: للصق البيانات
- Ctrl + Z: لتراجع عن آخر خطوة عملتها
- Ctrl + Y: لإعادة الخطوة اللي اتراجعت عنها
- Delete: لمسح محتوى الخلية أو البيانات
لازم تعود نفسك على الاختصارات دي لأنها هتوفر عليك وقت ومجهود في التكرار اليومي
لشرح دالة COUNTBLANK في إكسيل اضغط هنا
- اختصارات التنسيق:
التنسيق الصحيح للبيانات في الشيت بيخلي شكل الشيت أوضح وأسرع في القراءة فيه اختصارات بتسهل عليك عملية التنسيق
- Ctrl + B: لجعل النص عريض Bold
- Ctrl + I: لجعل النص مائل Italic
- Ctrl + U: لوضع خط تحت النص
- Ctrl + 1: لفتح نافذة تنسيق الخلايا
- Ctrl + Shift + %: لتنسيق الخلايا كنسبة مئوية
- Ctrl + Shift + $: لتنسيق الخلايا كعملة
التنسيق الصح بيخلي شغلك في إكسيل يبدو أكتر احترافية وسهل الفهم
- اختصارات المعادلات والحساب:
الإكسيل معروف إنه برنامج قوي في الحسابات ودايمًا بتحتاج تطبق معادلات وحسابات على البيانات اللي عندك فيه اختصارات لتسهيل الحسابات
- =: بداية أي معادلة
- Alt + =: لو عايز تعمل جمع تلقائي AutoSum
- F2: علشان تعدل في المعادلة داخل الخلية
- Ctrl + `: علشان تظهر المعادلات بدل النتائج
لو الشغل بتاعك بيعتمد على المعادلات الكثيرة لازم تعرف تستخدم الاختصارات دي علشان تسرع الشغل
لشرح شرح دالة COUNTA اضغط هنا
- أوامر سريعة مفيدة جدا:
فيه كمان أوامر سريعة موجودة في إكسيل بتساعدك في حاجات يومية زي الحفظ أو الطباعة أو البحث عن بيانات
- Ctrl + S: لحفظ الملف بسرعة
- Ctrl + P: لطباعة الملف
- Ctrl + F: للبحث عن نص أو بيانات في الشيت
- Ctrl + H: لاستبدال نص بنص تاني
- Ctrl + N: لفتح ملف جديد
- Ctrl + O: لفتح ملف موجود
دي اختصارات أساسية بتساعدك في الحاجات اليومية المتكررة
- أهمية اختصارات الإكسيل:
من غير ما تحسّ لو استخدمت الاختصارات دي في شغلك اليومي هتلاقي إن الشغل بقى أسرع وأقل تعب هتقلل من وقت التنفيذ وده مهم خصوصا لو عندك شغل كتير كمان هتتجنب الأخطاء البشرية اللي بتحصل لما بنضغط على الماوس كتير أو بنتنقل ببطء
الفوائد الرئيسية:
- توفير الوقت: لما تعرف تختصر وقتك في التنقل والعمليات اليومية
- الاحترافية: استخدام الاختصارات بيديك شكل أكتر احترافية قدام المديرين والزملاء
- زيادة الإنتاجية: لو بتستخدم الاختصارات هتقدر تعمل أكتر في وقت أقل
- الراحة: لو بتمسك الكيبورد بدل ما تستخدم الماوس هتحس براحة أكتر خصوصا لو بتشتغل فترات طويلة